الخميس، سبتمبر 22، 2011

سلفي امام السفاره

النص أدناه كتبه أحد أصدقائى وهو سلفى سابق تحرر الآن من قيود السلفية والإسلام فى آن واحد :



كنت عند واحد صاحبي فى الجيزه .. لقيت عنده شرايط كاسيت لشيوخ الاخوان .. وكان موتي وسمي الاخوان وقتها ... قلتله يا عم عماد مش هتسيبك من الناس دي اللى مش مبطله سب فى الحكام وتحرض على الخروج عليهم وتتبع منهج الخوارج المبتدعه كلاب اهل النار

وفضلت وراه لحد ما اقتنع وقالى لو سمعك حسني مبارك هيشيلك من على الأرض شيل

قلتله انا بقول كده عشان ارضي ربنا مش عشان ارضي خلقه .. وخالت عليه الفكره واقتنع اخيرا واداني الشرايط كلها بما فيها شرايط الاغانى والميتال وقالى اتصرف فيهم زى ما تحب يا مولانا

طبعا بعد ما خلصنا جلستنا السلفيه التخديريه .. قالى انا هوصلك وكنت انا وقتها ساكن فى عين شمس ... واحنا ماشيين من حسن حظنا عدينا من امام سفاره اسرائيل .. وهنا بدأت القصة

الكلام ده من 7 سنين تقريبا ... ماشيين لا بينا ولا علينا على النيل ونلاقى خير اللهم اجعله خير ظابط بينادي علينا .. واحنا منعرفش اننا عند السفاره الاسرائيلية اصلا

انا داخل عليه وواثق من نفسي بقا .. ما انا سلفي وفاهم اللى فيها .. والراجل الغلبان اللى معايا قلبه وقع فى ركبه .. وقال الشيخ هيضعنا النهارده .. وليلتنا مش هتعدي على خير

الضابط شاف البطاقات ولقى فيها اتنين من الفيوم معديين من امام السفاره الاسرائيلية اثناء زياره مدير امن الجيزه للمنطقة وكلاب الحراسة فى كل مكان وكلاب أمن الدولة واقفه بالآلى والمنطقه متقفله صح

الضابط بص فى الشنطه لقي شرايط من اللى قلبه يحبهم

وجدي غنيم على كشك على عمر عبد الكافي وعلى اغاني وموسيقى

قال ده تمويه ده ولا ايه .. ازاى مشايخ مع اغاني .. احكيله وافهمه مش عايز يفهم

المهم نقلونا فى عربيه فيات حمرا على امن الدولة فى الجيزه .. وهناك بدأت السلفية تلعب دورها بجداره

قبل ما ندخل جوا غموا عنينا .. وامين شرطه بيقولي معلشي دى تعليمات .. وانا بكل ادب سلفي بقوله لا عادي ده واجبكم لحماية الوطن ..شوف شغلك يا بنى وربنا يقويكم .. كان مجرد الاعتراض على افعالهم خروج على النظام وده حرام طبعا من المنظور السلفي

صاحبي دخل متغمي قالهم الشرايط دى بتاعتي والواد يا عينى اخره انه يصلي ويصوم وكنت انا السبب طبعا في توبته اللى جابتله المصايب

الباشا الكبير افتكره اخوان وصاحب تنظيم والراجل يا عينى مش عارف يتعامل ازاى مع الكلاب دي .. فاشتغلوا عليه كهربا لحد ما الواد بقا بينور

وسألوه عني قالهم كل خير طبعا وفتح نفسهم على الآخر انهم يتكلموا معايا

دخلت على الباشا الكبير .. وعندي الادوات اللى تعلي مزاجه وتكيف ام اللى جابوه

هو يسأل وانا اجاوبه ومع كل اجابه اقوله وعلينا السمع والطاعه لولي الأمر

دخل عمنا التانى ومعاه الكهربا وبيخوفنى بروح امه ويقول للضابط محتاج دى وبيكهرب الهوا والباشا طبعا قاعد متكيف من أفكاري اللى لا بتهش ولا بتنش ولا تنفع بقرش

فرد عليه وقاله لا .. لحد دلوقتى مش محتاجنها

المهم بعد ما خدرت عمنا وقلتله كل اللى عندي من النصوص والاحاديث اللى بتؤكد على أن النظام خط أحمر لا يجب نقده وان السمع والطاعه والضرب على القفا والمؤخره من حقهم علينا طبعا زى ما دينا أمرنا

نادى على اللى برا وقاله هاتله اكل ( ارز ولحمه وطبيخ وعيش وفاكهه طبعا )

وصاحبي المسكين اتهرى كهربا عشان مش سلفي وملوش فى الليله

بعزم على صاحبي بأكل لقيت نفسه مسدوده وفاكر انى اتبهدلت اكتر منه لانى بلحيه ونشط عنه فى الدين

اللى كانوا جوا فى العنبر قالولى متخفش كلها 3 ايام وهتطلعوا

بس مفعول السلفية كان اقوى من نظامهم وطلعت بعد 15 ساعه بس

والضابط حط ايده على كتفي وقالى شد حيلك يا حوده عشان تدخل هندسة وتحقق حلمك واعتذر لصاحبي بعد ما عرف انه تبعي وتحت تأثيري وعشان ميغيرش فكرته الجميلة عن كلاب النظام اللى انا زرعتها فى عقول صحابي كلهم

بعد ما خدنا حاجتنا والضابط بنفسه اطمن ان مفيش حاجه راحت مني وانى زى ما طلعت زى ما دخلت

لقيت صاحبي بيقولى هما عملوا معاك ايه جواا .. وكانت الصدمة لما عرف اللى حصل معايا

ازاااااااااااى .. انا شفت اللى حصلي .. قلت اكيد زمانك متقطع حتت ومرمي للكلاب

الواد يا عينى بدأ يشك فى دينه .. ازاى ربنا راضي عن الناس دى .. امال هيكون غضبان على مين

بس استخدمت معاه اسلوب التهديد .. وقلتله ده احسن اسلوب واسلم منهج

اهو تعيش سليم وبكرامتك وتموت وضميرك مرتاح وعلى السنه السلفية

واديك شفت مصير الخوارج فى الدنيا .. فما بالك فى الاخره

وصاحبنا عجبته اللعبه وبقى يقول آمين .. لولي الأمر المتين


هناك تعليقان (2):

نادي حواء يقول...

كن مصريا

غير معرف يقول...

http://www.facebook.com/pages/Three-Million-Movies/252839864747808